سؤال و جواب

شو الفرق اني استخدم روابط CDN في مشروعي للمكتبات زي بوتستراب او font awesome أو انزل الملفات وارفعها مع المشروع على الاستضافة؟

الجواب القصير:
لاغراض التطوير، الافضل انك تنزل المكتبة وتحفظها في مشروعك المحلي، عشان بس تضمن انه ما يتعطل شغلك لو فصل الانترنت او صار اي مشكلة بالشبكة، وتقدر تشتغل باي وقت واي مكان. لكن عند نشر المشروع، الأفضل انك تستخدم روابط الCDN.
الاسباب في الاحابة الطويلة
ال CDN هي اختصار ل
Content Delivery Network

وهي شركات متخصصة لنشر وتوصيل الملفات او المحتوى للمستخدمين. هذه الشركات عندهم سيرفرات في كل قارة وفي كثير دُول.

لما ترفع المشروع على سيرفر الاستضافة تبعك، لنفترض انه في امريكا، كل المستخدمين في كل العالم رح يتواصلو مع هذا السيرفر عشان يحصلو على الملفات، بالتالي ممكن يكون في خلل بالسرعة او الأداء، ويديد الضغط على السيرفر. اما في حالة استخدام CDN، انت بتقوم بتوصيل هذه الملفات عن طريق شبكة مختلفة، وتقلل الضغط على السيرفر تبعك وتستفيد من شبكة السيرفرات الكبيرة اللي بتقدمها شركات الCDN عشان يوصل الملف للمتصفح المستخدم بأسرع وقت.

كيف بتشتغل شركات الCDN؟

زي ما حكينا بيكون عندهم سيرفرات في اغلب الدول، فلما يجي متصفح من دولة معينة يفتح موقعك ويطلب ملفات بوتستراب مثلاً، بروح سيرفر CDN بطلب الملف من السيرفر تبع الموقع وبخدمه للمستخدم.

وبعدين بيحتفظ بنسخة من هذا الملف عنده في الكاش، بحيث له لو طلبه اي مستخدم ثاني يكون جاهز عنده وما يعمل طلب جديد للسيرفر تبعك او السيرفر الرئيسي تبع CDN. المحصلة، ومع الوقت، رح يكون الملفات دائماً موجوده عند اقرب سيرفر للمستخدم.

بالإضافة، المتصفح دائماً بعمل كاش برضو لملفات المواقع اللي بزورها المستخدم، لكن الملفات اللي بتيجي من CDN بعاملها معاملة خاصة وبحتفظ فيها فترة اطول وبطريقة مختلفة.
يعني ممكن لو نفس المستخدم فتح موقع ثاني يعتمد على بوتستراب، ما يحتاج اصلاً يبعث طلب للسيرفر او CDN.

أخيراً
استخدام CDN بضمن دائماً انك بتحصل على اخر اصدار او تحديث للمكتبة، مش كل مرة بدك تعدل الكود وتستخدم ميزات جديدة في المكتبة رح تكون مضطر انك تنزل ملفاتها وترفعها على السيرفر الخاص فيك.

المصدر : م/ Eiyad Ziyadah لينك البوست